होम लोनचं टेन्शन संपवायचंय? फक्त ‘हे’ करा आणि १५ लाख रुपये वाचवा!

सध्याच्या आर्थिक वातावरणात गृहकर्जधारकांसाठी अत्यंत दिलासादायक स्थिती आहे. यंदाच्या वर्षाच्या सुरुवातीलाच रिझर्व्ह बँक ऑफ इंडियाने (RBI) रेपो दरात कपात केली असून, परिणामी बँकांचे कर्जावरील व्याजदरही घसरले आहेत. फेब्रुवारी महिन्यात आरबीआयनं ०.२५% ने रेपो दरात घट केल्यानंतर एप्रिलमध्ये पुन्हा एकदा कपात करण्यात आली. तज्ज्ञांच्या मते, पुढील काही महिन्यांत आणखी दोन वेळा व्याजदरात कपात होण्याची शक्यता आहे. या घडामोडीमुळे गृहकर्जावर कमी व्याज लागण्याचा लाभ ग्राहकांना मिळत आहे.

व्याजदर घट – गृहकर्ज परतफेडीला गती

व्याजदरात घट झाल्याने गृहकर्जाची परतफेड अधिक वेगाने करता येणे शक्य होते. दीर्घकालीन कर्ज म्हणजे मोठा व्याज खर्च आणि मानसिक ताण. त्यामुळे जास्तीत जास्त गृहकर्जधारक लवकरात लवकर कर्जमुक्त होण्याचा विचार करत आहेत. शिवाय, नवीन करप्रणाली लागू झाल्यामुळे गृहकर्जावरील करसवलतींचा लाभ काहीसा मर्यादित झाला आहे. अशा परिस्थितीत गृहकर्जावर अंशतः आगाऊ रक्कम भरून लवकर परतफेड करणे ही अधिक फायदेशीर रणनीती ठरत आहे.

आगाऊ रक्कम भरल्याने होणारी मोठी बचत

गृहकर्जाची अंशतः आगाऊ परतफेड केल्याने शिल्लक रकमेवर लागणारं व्याज कमी होतं. परिणामी एकूण व्याज रक्कम मोठ्या प्रमाणात वाचते आणि परतफेडीचा कालावधी लक्षणीयरीत्या कमी होतो. उदाहरणार्थ, जर आपल्याकडे ४० लाख रुपयांचं कर्ज शिल्लक असेल, व्याजदर ८% असेल आणि २० वर्षांचा कालावधी शिल्लक असेल, तर फक्त १ लाख रुपयांची अतिरिक्त भर घातल्याने ३.७२ लाख रुपये व्याज वाचू शकते आणि कर्ज १४ महिने आधी संपू शकतं. जर ५ लाख रुपये भरले, तर तब्बल १५.११ लाख रुपयांचं व्याज वाचेल आणि ६० महिन्यांपूर्वीच कर्जमुक्त होता येईल.

वार्षिक अतिरिक्त भरण्याचा प्रभाव

दरवर्षी ठराविक रक्कम भरत राहिल्यास कर्जाच्या परतफेडीला गती येते. उदाहरणार्थ, ४० लाख रुपये शिल्लक असलेल्या कर्जावर जर तुम्ही दरवर्षी ५०,००० रुपयांची अतिरिक्त भरणा केली, तर १६ वर्षांत कर्ज पूर्णपणे संपेल. यामुळे ११.११ लाख रुपयांचं व्याज वाचेल आणि ५७ महिन्यांची मुदत कमी होईल. ही एक सोपी आणि शिस्तबद्ध पद्धत आहे, जी कोणत्याही गृहकर्जधारकाला परवडणारी आहे.

पगारवाढीचा योग्य वापर

काळाच्या ओघात बहुतेकांची उत्पन्नात वाढ होते. जर तुमचा पगार वाढला असेल, तर त्या वाढीचा काही भाग ईएमआय वाढवण्यासाठी वापरल्यास मोठा फायदा होतो. उदा., जर सध्याचा ईएमआय ₹33,458 आहे आणि तुम्ही तो ₹34,180 केला (फक्त ₹722 ने वाढवला), तर २.३७ लाख रुपयांचं व्याज वाचेल आणि कर्ज १२ महिन्यांपूर्वीच फेडलं जाईल. ही रणनीती ओझं वाढवणारी न वाटता, दीर्घकाळात शाश्वत लाभ देणारी ठरते.